Nakaituding nga ipasango iti House Prosecution Panel dagiti opisyal ti National Bureau of Investigation (NBI) ken House of Representatives kas testigo iti impeachment trial ni Vice President Sara Duterte a marugian inton July 6.
Iti naipasa a manifestation iti prosecution, nakalanad a karaman kadagiti immuna a testigo a maipasango da NBI Regional Director Atty. Jeremy Lotoc, NBI Senior Agent John Mark Calilung ken Legislative Security Bureau Executive Director Capt. Belinda Bello iti Office of the Sergeant-at-Arms.
Nailista dagiti tallo kas testigo para iti maikapat nga article of impeachment a mangakusar iti bise presidente iti culpable violation of the Constitution, high crimes ken betrayal of public trust nga adda pakainaigan iti mapapati a panagpangta ti bise presidente nga i-assassinate da Pres. Ferdinand Marcos Jr., First Lady Liza Araneta-Marcos ken dati a House Speaker Martin Romualdez.
Maisayangkat ti presentasyon dagiti testigo iti prosecution manipod July 6 agingga July 8.
