Awan ti plano ti National Bureau of Investigation nga imbestigaran ti political speech ni dati a Presidente Rodrigo Duterte mainaig iti panangpapatay kadagiti sangapulo ket lima a senador.
Segun ken ni NBI Director Jaime Santiago, ammona a saan a seryoso ti insawang ti dati a presidente ken paset laeng daytoy iti retorika.
Malaksid dayta, awan met ti innaganan a senador ti dati a presidente ken awan ti kunana nga incumbent wenno tumaray pay laeng dagiti senador.
Maikontra daytoy iti inaramid ni Vice Presidente Sara Duterte a nagpaawag ti press conference ken innagananna dagiti ipapatayna no bilang isuna ti mapapatay.
Imbasura ni Santiago ti karit iti NBI ni Rep. Zia Adiong ken dagiti dadduma pay a kongresista nga imbestigaranda ti dati a presidente ta kunana a saan a kongresista ti nasken nga agimbestigar iti dati a presidente, no di ket miembro ti Senado.
