Indeklarar ni President Ferdinand Marcos Jr. ti National Mourning iti intero a pagilian gapu iti pannakatay ni Pope Francis.
Iti salinong ti Proclamation No. 871, imbilin ti presidente iti pannaka-half mast iti bandera iti Pilipinas iti amin a pasdek iti gobierno iti pagilian ken ballasiw-taaw nangrugi idi kalman agingga inton maitabon ti Santo Papa.
Nakalanad nga adda iti lugar ni Pope Francis iti tunggal Pilipino kalpasan ti Apostolic Visit-na iti Pilipinas idi 2015 a nakikaysaanna kadagiti biktima ti Bagyo Yolanda ken pinadayawanna iti kinatibker iti pammati dagiti Pilipino iti laksid dagiti pannubok.
Gapu dayta ket makipagladingit dagiti Pilipino iti pannakatay ti Santo Papa a bigbigen a lider iti simbaan nga adda panangisakit ken nangiyetnag iti kinakappia, hustisya ken dignidad iti tao.
