VIGAN CITY – Impasigurado ni PCol. Darnell Dulnuan nga Acting Provincial Director iti Ilocos Sur Police Provincial Office nga ingetanda iti seguridad dagiti umili ita nga Undas 2023 a kas iti inyetnagda idi Barangay and Sangguniang Kabataan Elections.
Iti pannaki-uman ti Bombo Radyo Vigan ken ni Dulnuan, manipod Tagudin agingga Sinait ket binilinna amin a Chief of Police iti probinsia tapno siguradoen ti kintalged dagiti tattao a bumisita kadagiti natayen a kameng ti pamiliada ken ay-ayatenda.
Segun kenkuana, adda dagiti assistance desk a pagtalinaedan dagiti pannakabagi ti linteg pakairaman dagiti kameng ti Bureau of Fire Protection personnel ken dagiti kameng ti Rural Health Unit para iti panag-first aid nu bilang adda dagiti agkasapulan kadakuada.
Siguradoenna pay a maaddaan iti nainget a panangkita kadagiti mapan iti kamposanto tapno masigurado nga awan iti agikot iti aniaman a makadangran iti pada a tao, awan iti agitugot iti arak ken karaoke wenno aniaman a naariwawa a mabalin a gappuanan ti pannakariribok kadagiti dadduma pay a bumisita.
Kabayatanna, naaddaanda iti security and traffic plan para iti naannayas a panagtaray iti trapiko kagiddan ti manamnama nga adu a lugan kadagiti kalsada.
VIDEO OF PCOL DARNELL DULNUAN
