Nasurok P40,000 a gatad ti mapapati nga intaray dagiti 2 nga Indian national idiay Barangay Mantanas, Sta. Cruz, Ilocos Sur.
Dagiti biktima ket agassawa nga agpada nga agtawen iti limapulo ket tallo, agnaed iti nasao a lugar.
Dagiti met suspek ket agtawen iti tallopulo ket siam ken limapulo ket maysa, agnaed iti Caloocan City ken Tarlac City.
Nagturong dagiti biktima iti Sta. Cruz Police Station tapno ireport nga idi January 31, 2026, alas kuatro kwarenta y singko, addada iti ruar ti pagtanganda idin ta adda maysa a dark gray Mitsubishi Xpander a nagsardeng iti sangwananda.
Dimsaag dagiti dua nga Indian national a pakairamanan ti maysa a babai ken lalaki nga agpatpatulong no pakasarakanda iti peanut product.
Impakita dagiti suspek ti nadumaduma a Philippine peso bills ket sinaludsodda dagiti biktima no mano ti gatadna ken nangipakitada pay iti bundles ti US dollar bills.
Kalpasanna, sinaludsod dagiti suspek no ania ti kita ti P500 isu nga immune met a nangala iti P500 bill ti babai a biktima ngem saanna a napuotan a sinurot isuna ti lalaki a suspek.
Bayat ti panangala ti biktima iti P500 manipud iti nasiglot iti lastiko a a kuartana iti uneg ti bag-na, nagbabawin ti lalaki a suspek ket iniggananna ti ima ti biktima a nagpammarang a tulonganna a mangidulin ti kuarta iti uneg ti bag-na.
Nagpakada dagiti suspek ket limmuganda sa nagturongdan iti abagatan.
Naammuan met dagiti biktima manipud iti kaanakanda a dagiti nasao nga Indian ket scammer nga agdakdakiwas iti probinsia.
Dagus a kinita ti babai a biktima ti kuartana ket naduktalanna a P26,000 laengen ti nagbati manipud iti P68,500 ta ti P42,500 ket isu ti mapapatin nga innala dagiti suspek.
