Umaboten iti nasurok lima gasut a pamilia ti naibakwit babaen iti naisayangkat a pre-emptive evacuation manipud kadagiti nadumaduma a Local Government Unit iti probinsia iti baet ti panagduprak ti bagyo Kristine.
Iti pannaki-uman ti Bombo Radyo Vigan ken ni Governor Jerry Singson, dagiti evacuee ket agtaltalinaed ita kadagiti evacuation center a ti kaaduan kadakuada ket naggapu kadagiti coastal area.
Impasigurado ni Singson a nakasagana ti Ilocos Sur Provincial Government a mangipaay iti tulong kadagiti apektado nga agindeg.
Malaksid dayta, nagpanawagan ti gobernador kadagiti agindeg nga agalerto, agsagana ken makidamag latta no ania ti sasaaden ti panawen.
Balakadna kadagiti agindeg a no kasapulan ket agbakwit iti nasapsapan kadagiti nataltalged a lugar sakbay pay a ngumato ti lebel ti danum.
Pagyamananna met a nasapa a nakaapit dagiti mannalon kadagiti mulada sakbay ti idadateng ti bagyo.
Iti agdama, awan pay ti nairekord a nadad-dadael a pagtaengan malaksid laeng ti napasamak a panagreggaay ti daga iti ili ti Cervantes.
