Nanayunan pay dagiti apektado ti madi a paniempo gapu iti epekto ti habagat ken napalabas a Bagyo Mirasol.
Maibasar iti maudi a pakaammo ti National Disaster Risk Reduction and Management Council (NDRRMC), umaboten iti 22,101 a pamilya wenno katukad iti nasurok 81,000 nga indibidual iti naapektaran iti madi a panawen.
Segun ti NDRRMC, dagiti naapektaran ket manipod Cagayan Valley, Cordillera Administrative Region, Central Luzon, Bicol Region ken Western Visayas.
Add pay dua a kalsada ken lima a rangtay iti temporaryo a saan a madalanan dagiti motorista kangrunaan idiay Region 2.
Nakairekord pay iti sangapulo ket innem a pagtaengan iti nadadael gapu iti madi a panawen ket sangapulo ket maysa iti partially damaged idinto a lima iti totally damaged. Awan met iti naireport a natay ken nadunor ngem adda iti maysa a mapukpukaw nga agtultuloy a maberberipikar.
