Umaboten iti 553,068 nga indibidwal wenno 137,081 pamilia manipud iti 401 a barangay iti Regions IX, XI, XII, ken BARMM ti naapektaran ti magnitude 7.8 a ginggined a timmama idiay Maasim, Sarangani, segun ti Department of Social Welfare and Development (DSWD).
Umabot iti 9,393 a tattao wenno 2,131 a pamilia ti agtaltalinaed iti 26 evacuation centers, idinto a 54,274 nga indibidwal wenno 13,480 a pamilia ti temporario a nagtalinaed iti balay dagiti kabagyan-da.
Nairekord pay ti dakkel a perdisyon kadagiti pagtaengan ken umabot iti 8, 865 a balay ti talaga a nadadael ken 36, 691 met ti na-damage.
Segun iti DSWD, umaboten iti P84.26 milyon ti naipaay a humanitarian assistance manipud iti national ken lokal a gobierno kasta payen kadagiti kabinnulig nga ahensia.
Agtultuloy latta met ti damage assessment, relief distribution ken panangted ti psychosocial ken social protection services kadagiti pamilia a naapektaran.
