VIGAN CITY – Kiniddaw ni Provincial Quarantine Officer Martel Quitoriano kadagiti online seller a siguraduenda a legal dagiti ilaklakoda gapu kadagiti nasalamaanda a produkto ti karne iti nagsaruno nga aldaw.
Iti pannaki-uman ti Bombo Radyo Vigan ken ni Quitoriano, awan ti dokumento dagiti meat products a nasalamaanda iti animal quarantine checkpoint idiay Bio, Tagudin.
415 kilograms iti chicken longanisa nga aggatad iti limapulo ket lima a ribo a pisos a kinarga ti nasao a lugan a minaneho ni Ederloise Padua, agtawen ti duapulo ket walo, baro nga agnaed idiay Brgy. San Isidro, Candon kaduana ti akinkukua kadagiti produkto a ni Monica Molina, agtawen ti duapulo ket pito, balasang nga agnaed idiay Brgy. San Jose, Candon City.
Kabayatanna, duapulo ket maysa a kilo ti beef, walopulo ket maysa a kilo ti manok ken duagasut tallopulo ket uppat a kilo ti karne ti baboy nga aggatad iti PHP.80,630 a nakaikarga iti Mitsubishi Canter Refrigerayed van ti nasalamaan met laeng dagiti pannakabagi ti linteg.
Dagiti nasao a produkto ket impastrek ni Eduard Lime Madrid, agtawen ti tallopulo nga agnaed idiay San Juan Albano, Isabela.
