VIGAN CITY – Imbilin ni Ilocos Sur Governor Jerry Singson iti Ilocos Sur Police Provincial Office a papigsaenda ti kampania kontra loose firearms gapu kadagiti nagsasaruno nga insidente iti pammaltog iti probinsia.
Iti press conference a napasamak, pinasingkedan ni Governor Singson nga adda ti rekord ti ISPPO kadagiti registered firearm ngem awan kadagiti loose firearm a patienna a maysa a rason no apay nga adu dagiti natured a pumaltog.
Binilin ti gobernador ni Ilocos Sur Police Provincial Director Police Colonel Darnell Dulnuan nga ipasnekda ti daytoy nga akemda tapno saanen a kumaro ken tapno patien met laeng dagiti agindeg ken dagiti umay bumisita a natalna ti probinsia.
Kabayatanna, madama met ti panangduktal ti gobernador kasano a nakastrek iti provincial government ti biktima iti pammaltog idiay Taleb, Bantay a ni Jayson Parchamento ken no kasano a dagus a napromote a kas Prison Guard 3 iti Ilocos Sur Provincial Jail.
