VIGAN CITY – Mangidiaya ti Santa Local Government Unit kadagiti agindeg iti nasao nga ili ti nalaklaka nga antigen test nga aramatenda numan bilang mapanda kadagiti sabali a lugar ta isu ti maysa a kasapulan ti negatibo a resultada iti Covid19 test sakbay a makastrekda kadagiti lugar a papananda.
Dayta nga addang ket inkari ni Mayor Jesus “Popoy” Bueno tapno saanen a marigatan dagiti residente nga aggasto iti nangin-ngina ta aggatad laeng iti nasurok kumurang a sangaribo a pisos a nalaklaka no yarig iti uppat a ribo a pisos a presyo iti swab testing.
Nupay kasta, mabalinda laeng a makikammayet a nasapsapa iti Rural Health Unit iti Santa babaen iti panangidaulo ni Dr. Marilou Cardenas tapno maiproseso ti resultada.
Babaen iti antigen test ket nadardaras a maala ti resulta ta mayuray laeng iti sumagmamano a minutos no yarig kadagiti sabali a wagas iti Covid19 test a mayuray pay iti mano nga aldaw.
