VIGAN CITY – Nasurok PHP6.9 million a gatad iti pinarut ken pinuoran dagiti pannakabagi iti linteg a fully grown marijuana iti Sitio Sawangan, Brgy. Danac, Sugpon.
Iti pannaki-uman ti Bombo Radyo Vigan ken ni Police Captain Rovic Nelmida iti Sugpon Municipal Police Station, dua nga aldaw iti operasyondaa nangrugi idi April 22 iti rabii ket nalpas iti April 23 ti alas kuatro y media ti malem.
Segun kenni Nelmida, naipakaammo kadakuada dagiti naimula a marijuana iti nasao a lugar ket in-validate dagiti tropa, agingga nakumpirmaranda a positibo isunga insayangkatda ti Marijuana Eradication.
Nakalibas met dagiti suspek nga isuda Ryan Palinas, ken Emong Palinas, a mapapati a residente iti Barangay Tacadang, Kibungan Benguet.
Nasurok kumurang 28,820 a fully grown marijuana, 10 kilos a dried marijuana leaves, ken 360 a marijuana seedlings ti naala manipud iti siyam a cultivating sites.
Panawagan ni Nelmida a liklikanen ti publiko nga agmula ti marijuna ta delikado kadagiti agtutubo.
