Imbabawi ti House Quad Committee ti impatawda a contempt kada dati a Bamban, Tarlac Mayor Alice Guo, Cassandra Ong iti Lucky South 99 ken negosyante a ni Tony Yang.
Ti addang ket gappuanan ti pannakawaya-waya ni Ong iti pannakaibalud iti Quad Committee iti Correctional Institute for Women wenno CIW idiay Mandaluyong ken mapapati nga agsagsagaba ti depression.
Iti agdama ket nakaibalud met ni Guo iti Pasig City ken sumangsango ti kaso a kriminal idinto a ni Yang ket nakakustyodiya iti Presidential Anti-Organized Crime Commission ken adda kaso a sangsangwenna ken naamoan ti komite nga adda sakitna ken naka-confine iti maysa nga ospital idiay Taguig.
Imbabawi pay ti Quad Committee ti contempt order ken ni Police Maj. Leo Laraga kagiddan iti paskua.
Maipalagip nga impabalud ti Quad Committee ni Laraga ta patienda nga agsalsalawasaw inaig iti pannakapapatay ken ni dati nga Albuera Mayor Rolando Espinosa iti uneg iti pagbaludan.
