VIGAN CITY – Addan ti person of interest iti likodan ti panagimula iti umabot innem a million a pisos a gatad ti marijuana idiay Sitio Nagawa Brgy. Caoayan, Sugpon.
Iti pannaki-uman ti Bombo Radyo Vigan ken ni PMaj. Fernan Rivera, dua a bulan a naidalan ti surveillance dagiti innem a site iti nasao a lugar sakbay a naisayangkat iti operasyon.
Segun ken ni Rivera, nupay awan ti nadanonan da a cultivator ket namnamaenda a maamoandanto met laeng dagiti nagimula iti nasao a marijuana.
Maipalagip a naala iti umuna a site ti 5,200 a piraso ti fully grown marijuana plants nga aggatad ti P1,040,000; iti Site 2 ket nakaalada ti 6,400 a piraso a fully grown marijuana plants nga aggatad ti P1.2 milion pesos; Site 3 ket nakaala da ti 5,600 fully grown marijuana plants nga aggatad ti P1.1 milion pesos; Site ket nakaala ti 650 marijuana seedlings a mapatta-patta nga aggatad ti P52,000 pesos; Site 5 ket nakaalada ti 7,000 a fully grown marijuana plants nga aggatad ti P1.4 milion pesos; ken Site 6 a nakaala da ti 5,500 fully grown marijuana plants nga aggatad ti P1.1 milion pesos.
Kabayatanna, balakadna kadagiti agimulmula iti marijuana a makapagpampanunotdan ta saan a napintas iti epektona dayta para kadagiti agtutubo ken impalagipna a nu makemmegda ket awan ti gatad ti pyansa a mairekomendar kadakuada nu bilang makasoanda.
