Na-fracture ti nagmaneho ti kotse gapu iti aksidente a pannakaidungparna iti maysa a truck iti provincial road, Barangay Pangada, Sta. Catalina, Ilocos Sur idi kalman, March 13, 2026.
Segun ti Sta. Catalina Municipal Police Station, ti nagmaneho iti Toyota Vios ket agtawen iti duapulo ket maysa, holder iti Non-Professional Driver’s License nga agnaed idiay Don Alejandro Quirolgico, Caoayan idinto a ti nagmaneho iti Dropside Elf Truck ket agtawen iti tallopulo ket innem, naasawaan, truck driver nga agnaed idiay Anapao, Burgos, Pangasinan, kaduana dagiti helper-na nga agtawen iti tallopulo ket tallo nga agnaed idiay Barangay Sinapangan Sur, Bangar, La Union ken agtawen iti uppat a pulo ket maysa, naasawaan nga agnaed idiay Barangay Cabaroan, Tagudin.
Sakbay iti insidente, agturong iti laud a direksyon wenno mapan iti Sta. Catalina ti kotse idinto a ti truck ket agturong iti ili ti San Vicente.
Idi nadanonda iti nasao a lugar ket bayat iti panagsikko ti kotse ket nadungpar iti truck iti sango a paset iti kotse ket gapu iti impact naiyadayo ti dua a metro.
Gapu iti fracture a sinagaba ti nagmaneho iti kotse ket naipan iti Ilocos Sur Provincial Hospital – Gabriela Silang para iti pannakatamingna, idinto a ti nagmaneho ken naglugan iti truck ket saan a naan-ano.
