Natay dagiti nagkalubbon iti motorsiklo kalpasan a natukbobda ti trak iti national highway ti Barangay Tablac, Candon City, Ilocos Sur.
Karaman iti aksidente ti maysa a 10-wheeler truck a minaneho ti lalaki nga agtawen iti limapulo ket innem, agnaed iti Barangay Talogtog, Dolores, Abra.
Ti met motorsiklo ket minaneho ti lalaki nga agtawen iti tallopulo ket uppat, kinalubbonna ti maysa a lalaki, agpadada nga agnaed iti Barangay Dan-ar, Santiago.
Iti pannaki-uman ti Bombo Radyo Vigan ken ni PLT. Jovelyn Antalan, agpapa-amianan dagiti 2 a lugan a ti motorsiklo ket sarsarunwenna ti trak ket idi nadanonda ti nakapasamakan ti aksidente, natukbob ti motorsiklo ti nagpreno a trak.
Naipan iti bangir a linya dagiti nagkalubbon ket nagsagrapda iti fatal injury.
Naitaray dagiti nagkalubbon iti ospital ngem naideklararda a dead on arrival idinto a ti drayber ti trak ket saan a naan-ano.
Nakainom dagiti nagkalubbon idi napasamak ti aksidente ken mapapati a napaspas ti patarayda.
Malaksid dayta, naammuan pay nga ita nga aldaw ti panagkasangay ti natay a drayber.
