Nadunor dagiti nagkalubbon iti motorsiklo gapu iti pannaka-aksidenteda idiay Barangay Puerta Real, Sto. Domingo, Ilocos Sur.
Nabigbig ti nagmaneho iti Suzuki Raider a motorsiklo a ni Marvin Prospero Tabin, agtawen iti tallopulo ket uppat, kinalubbonna ni Jay Ar Tagudar, agpada a taga-Barangay Paras, iti nasao nga ili.
Ti met nagmaneho iti Toyota Hilux ket ni Kristine Karen Aquino Ferrer, agtawen iti uppat a pulo ket maysa, taga-13 Don Pedro Street, Villa Cecilia Subdivision, Mambungan, Antipolo City, Rizal.
Agpapa-amianan ti Toyota Hilux ket idi nadanonna ti nakapasamakan ti insidente, bigla nga immagaw ti linya ti motorsiklo ket nasagidna ti akin-kannigid a likudan a paset ti Hilux.
Gapu dayta, nadunor iti nadumaduma a paset ti bagi dagiti nagkalubbon a naipaagas iti ospital para iti pannakatamingda.
Saan met a naan-ano ti drayber ti nagmaneho iti Hilux ngem naipan latta iti Magsingal District Hospital para iti idadalanna iti medico-legal examination.
