Naiserbi ti search warrant kontra iti agtawen ti limapulo ket pito a lalaki idiay Barangay Langaoan, Sta. Maria, Ilocos Sur gapu iti panaglabsingna iti Republic Act 10591 wenno Comprehensive Firearms and Ammunition Act.
Iti pannaki-uman ti Bombo Radyo Vigan ken ni Police Major Macario Dulawan Jr., ti suspek ket ni Quirino Laguesma Marcos, agtawen iti limapulo ket pito, mannalon ken residente iti nasao a lugar.
Babaen iti panagtitinnulong dagiti otoridad ket naisayangkat ti search warrant operation nga inruar ti Presiding Judge iti Regional Trial Court Branch 72 Narvacan a napetsaan idi February 11, 2025.
Awan ti subject person idi napasamak ti operasyon ngem naala iti pagtaenganna ti maysa nga M16 magazine, tallo a piraso ti live ammunition iti caliber 5.56, maysa a piraso ti magazine ti caliber .45, tallo a piraso iti live ammunition caliber .45 ken dua nga empty shell iti caliber .45.
Dagiti naala nga ebidensya ket nakakustodian iti Sta. Maria Municipal Police Station para ti proper documentation sakbay iti pannakaiturn over-na iti issuing court.
Nagpalagip met ti Police Major Macario nga ita panawen ti eleksion ket bantayanda a nasayaaat ti ili tapno maliklikan ti pammaltog ken mapagtalinaed a natalna iti umadani nga eleksion.
