VIGAN CITY – Tallo a banag iti insingasing ti Samahan ng Industriya at Agrikultura (SINAG) chairmnan Rosendo So tapnu makissayan iti epekto ti nalaka a presyo dagiti irik a produkto da gapu ti Rice Tarrification Law kalpasan iti pangadal da ti rice importation record iti pagilian idi 2005, 2015 ken itatta a tawen.
Ti pannki-uman ti Bombo Radyo Vigan ken ni So, ti panangpainget iti panangited ti phytosanitary certificate kadagiti imported a produkto ti maysa kadagiti wagas nga insingasing da tapnu matulungan dagiti mannalon ditoy pagilian.
Malaksid iti dayta, innayon pay ti opisyal a kiddawen danto pay ken ni Presidente Rodrigo Duterte a nayunan da iti buwis dagiti imported a produkto ngem daytoy ket masapul to pay a dumalan iti Kongreso.
Maysa pay kadagiti singasing ti SINAG nga aramiden iti gobiyerno ket iti panangikabil ti triggered price tapnu masalakniban dagiti local a mannalon nu mapaneknekan a nalaklaka dagiti imported a bagas.
Ngem para ti opisyal, ti kalakaan a maipatungpal itatta a panagaapiten dagiti mannalon ket iti panangpainget iti panagited iti gobiyerno ti phytosanitary certificate tapnu masigurado a de kalidad dagiti sumsumrek ditoy pagilian nga imported a bagas.
