VIGAN CITY – Mismo a ni Santa Mayor Jesus “Popoy” Bueno ti naglikmot kadagiti barangay iti nasao nga ili tapnu paka-ammoan na dagiti kailyan na inaig iti napagtataripnonganda idi naminsan nga aldaw inaig iti pannakaisakup ti community quarantine ti probinsia nga indaulwan ni Gov. Ryan Singson.
Babaen iti sound system ken microphone kadua dagiti pulis ket inyunay-unayna iti panangsurot iti tunggal maysa kadagiti paglintegan nga inyetnag ti provincial government iti kangitingitan ti pangta ti COVID19.
Kabayatanna, kiddawen ni Bantay Mayor Samuel “Sammy” Parilla kadagiti kalugaran na a sumurot da iti bilin ti gobernador tapno agtalinaed latta a COVID free iti probinsia.
Dagiti saan a sumurot ket mabalin a maidarum da ken agmuwelta ti sangapulo a ribo a pisos agpangato.
Ti agdama, adda ti uppat a gasut uppat a pulo ket tallo a persons under monitoring ken tallo a persons under investigation idiay Bantay a naggapu idiay National Capital Region.
Ti sabali a bangir, nadalusan idi kalman iti tiendaan ti ili a Sto. Domingo kas bilin ni Mayor Bryan Dexter Tadena isu a naipasarra pay laeng dagiti amin a pagtagilakuan para iti disinfection a kas paset pay laeng iti nainget a panangipatungpal ti probinsia kadagiti precautionary measure kontra iti nasao a sakit ngem tatta nga aldaw ket agsublin iti normal nga operasyon iti tiyendaan.
