Patien ti maysa a political analyst a kurang ti affidavit ni Ramil Madriaga a pagibasaran tapno makuna a napigsa ti kaso kontra ken ni Vice President Sara Duterte.
Iti Dura Lex Sed Lex program ti Bombo Radyo Vigan, pinasingkedan ni Atty. Michael Henry Yusingco a masapul nga adda nadumaduma nga ebidensia a mapagsisilpo ken mangala iti testimonia ti sabali pay kangrunaan dagiti dinakamat ni Madriaga a personalidad iti affidavit-na.
Segun ken ni Yusingco, saan a mabalin a patien lattan a dagus ti ibagbaga ni Madriaga a nagipatulod iti kuarta ta saan a nakita ti kredibilidadna iti naisayangkat a hearing para iti impeachment ti bise presidente.
Kabayatanna, naklaat pay ti political analyst a napalubosan ni Madriaga a mangbasa iti affidavit-na ket nairaman dagiti banag a saan a konektado iti impeachment charges, ngem maawatanna ta awan idi kadagita a kanito ti abogado ni VP Sara.
