VIGAN CITY- Panagibales iti maysa kadagiti makitkita ti Sta. Maria municipal police station a motibo iti pammaltog a napasamak idiay Danuman East, Sta. Maria idi alas syete iti bigat idi kalman a nakainbolbaran ti biktima a ni Gerardo Reboldela Dar nga agtawen iti tallo pulo ket walo, naasawaan, mannalon ken agnaed met laeng iti nasao a lugar.
Pinasingkedan ni Police Senior Inspector Arcadio Viloria, hepe ti Sta. Maria municipal police station a malaksid iti rekord ti biktima kas maysa a drug surrenderee, idi September 19, 2016 ket adda ti kaso na a frustrated murder ta isuna iti mapapati a nangpaltog iti asawa ti kasinsin na.
Naamuan pay nga itay kallabes ket rinespondean ti Sta. Maria PNP ti biktima gapu ti saan da a panagkinnaawatan iti uliteg na a dati a kapitan iti barangay da.
Ti agdama, nakaintensive care unit pay laeng idiay Ilocos Sur Provincial Hospital- Gabriela Silang ti biktima a nagsagaba iti lima a tama iti paltog.
