Saan laeng a pagkurangan ti security measures ti rason ti kinaranggas kadagiti pagadalan no diketdi ti napaut a panangbaybay-a iti gobierno kangrunaan ti Department of Education (DepEd) iti mental health dagiti agad-adal.
Dayta iti pinasingkedan ni ACT Teacher Party-list Rep. Antonio Tinio kalpasan a pormal a naipila ti resolusyonda tapno imbestigaran dagiti kinaranggas kadagiti pagadalan kas iti pammaltog iti dua nga estudyante iti San Jose National High School idiay Tacloban City ken ti panagbagkong ti maysa nga agad-adal idiay Gen. Trias, Cavite.
Kinuna ni Tinio a saan a rumbeng a palabsen ti nasao a gundaway a bigbigen no ania iti pudno a rason iti kinaranggas kadagiti pagadalan ta saan a simple a security failure laeng ti napasamak no diketdi resulta iti napaut a krisis iti edukasyon gapu iti kaawan ti pondo iti gobierno iti mental health services dagiti pagadalan.
Segun kenkuana, agkurang iti 150,000 a public school teachers isu a saan a mabantayan dagiti mangisursuro dagiti estudyanteda idinto a duaribo laeng iti guidance counselor iti intero a pagilian, adayo no yarig iti 50,000 a guidance counselor a kasapulan.
Pinasingkedanna pay a napirmaan pay ti gobierno iti P2.97 billion para iti school-based mental health program iti 2026 general appropriations act (GAA) ngem agkurang latta dagiti personnel nga agbantay iti mental health dagiti estudyante.
