Imbingay ti Malakanyang nga immabot iti 27,897 a dati a rebelde ken dagiti agpampannuray kadakuada ti nagsubli iti gobierno manipud Hulio 2022 ken nakaawatda iti dagup a P1-B a tulong pinansial ken dadduma pay a tulong.
Segun iti National Task Force to End Local Communist Armed Conflict (NTF-Elcac), karaman iti naawatda a tulong ti livelihood opportunities, edukasion ken dadduma pay a programa para iti pannakaikamengda manen iti komunidad.
Binilin ni Presidente Ferdinand Marcos Jr. dagiti maseknan nga ahensia nga ipangpangrunada ti transformation program tapno matulongan dagiti dati a rebelde ken dagiti pamiliada a mangrugi manen.
Kabayatanna, nangidatag ti gobierno ti P44.9-B para kadagiti development projects iti 5,638 a barangay a pakairamanan ti pannakaaramid ti 978 classrooms, 1,601 kilometro a farm-to-market roads, 1,182 water and sanitation systems ken 556 health stations a manamnama a pakagunggonaan ti 16.08 million a Pilipino.
