VIGAN CITY – Immapela ni dati a Philippine Olympic Committee (POC) Chairman ken agdama a Samahang Weightlifting ng Pilipinas (SWP) president Monico Puentevella, babaen iti pannaki-uman ti Bombo Radyo Vigan kenkuana, a makibiyangen ti Malacañang iti isyu ti liderato ti POC.
Dayta ket kalpasan a rimuwar idi kalman a naisanud iti eleksyon kuma dagiti POC official itatta nga aldaw inton July 28 kas bilin ti International Olympic Committee ken nagwaras iti damag a saan nga amin ket nagikkat iti puwesto a maikontra iti nagtutulagan da iti kaudian a taripnong da idi napan a lawas.
Segun ken ni Puentevella, nu saan pay laeng a masimpa iti isyu ti liderato ti POC inton July 28 ket posible a saanen a matuloy ti 30th SEA Games a maisayangkat ditoy pagilian ta awan ton iti oras da isu a kayat na a makibiyangen ti Malacañang inaig iti nasao a banag ket bagbagaan da dagiti miyembro ti asosasyon.
Innayon na a masapul nga agtataripnong da pay nga umuna sakbay ti eleksyon inton July 28 tapnu pagpapatangan da nu anya dagiti posisyon a bakante ken masimpa dan iti saan da a panagkikinnaawatan tapnu saan da a nakababain.
