VIGAN CITY – Sumango iti kaso a panaglabsing ti Republic Act 9165 wenno Comprehensive Dangerous Drugs Act of 2002 ni Kevin Tajon Gonzales, agtawen ti tallopulo, agnaed idiay Nalasin, Sto. Domingo, barangay kagawad ken maysa a high value target ti Philippine Drug Enforcement Agency a nakemmeg babaen iti naiwayat a buy bust operation.
Iti pannaki-uman ti Bombo Radyo Vigan ken ni PDEA – Provincial Director Annabelle Cabarles, datin a drug surrenderee ti suspek a nabayagen a sinipsiputanda gapu iti iligal nga aramidna ken nagpositibo kadagiti dimmalananna a drug test.
Naduktalan pay nga adu dagiti opisial iti PDEA ti amammo ti suspek isu a natured a mangitultuloy ti aramidna ken mapapati a dagiti courier services ti pangipatpatulodan kenkuana ti supplier na kadagiti iligal a droga.
Malaksid iti dayta, pinaglibakanna a kukuana dagiti shabu a naala kenkuana a pakairamanan ti maysa a medium heat sealed sachet nga agdagsen ti 1.4 a gramo a mapatta-patta nga aggatad iti nasurok kumurang sangaribo a pisos, maysa a sangaribo a pisos, pito a piraso ti sangaribo a pisos a boodle money ken drug paraphernalia.
Iggemen dagiti pannakabagi ti linteg ti Sto. Domingo Police Station ti suspek tapno dumalan iti usto a proseso.
