VIGAN CITY – Imbilin ni San Esteban Mayor Ray Elaydo II ti panagpatrolya iti kabaybayan a paset ti nasao nga ili kalpasan dagiti nagsasaruno a pannakaalaw iti droga dagiti mangngalap ti probinsia.
Gapu dayta, nagtignay dagiti kameng ti Municipal Disaster Risk Reduction and Management Council, Coast Guard, Maritime police ken Bantay Dagat a nakabase idiay San Esteban a likmutenda ti kabaybayan ken in-coordinate-da kadagiti dadduma pay a munisipio ken ahensia kas ti Philippine Drug Enforcement Group ken Philippine Drug Enforcement Agency.
Segun ken ni Mayor Elaydo II, ti addang ket gapu iti pannakaalarmana kadagiti naal-alaw nga iligal a droga ta saanna kayat nga adda met maalaw a kasta dagiti mangngalap iti nasao nga ili.
Kabayatanna, nagpatulong ni Elaydo a nangrescue iti maysa a bangka a nadadael ta kunana a maipangruna latta ti kinatalged dagiti agpatrolya.
Nupay kasta, pinagyamanan ti mayor iti dagus a pannakatungpal ti bilinna ken bigbigenna a dakkel a banag ti panagkaykaysa dagiti maseknan iti panagbantay ken panagpatrolya iti kabaybayan.
