Inlawlawag ti Malakanyang a saan nga imbasura ti Sandiganbayan ti graft case kontra iti pugante a ni Zaldy Co kalpasan a na-archive.
Segun ken ni Palace Press Officer Undersecretary Claire Castro, procedural laeng ti panag-archive iti kaso ta agtaltalinaed nga at large ni Co ken saan a maipatpatungpal ti warrant of arrest kontra kenkuana.
Ti archive case ket temporaryo a naikkat iti listaan dagiti kaso a madengdengngeg iti korte ken saan a mangipasimudaag a naibasura wenno naisarran iti kaso.
Kinuna ni Castro nga apaman a makemmeg ni Co ket insigida a maisubli iti aktibo a panagdenggeg iti kaso.
Innayonna a suspendido iti panagtaray ti prescriptive period bayat a naka-archive ti kaso isu nga agtalinaed nga adda sungsungbatanna iti linteg no makemmeg.
