Pinasingkedan ni House Prosecutor ken Manila 3rd District Rep. Joel Chua a nasaysayaat a maipalubos ti camera ti media iti uneg ti Senate Impeachment Court bayat a maisaysayangkat ti trial ni Vice President Sara Duterte tapno mayetnag iti transparency.
Impalagip ni Chua nga idi panawen ti impeachment trial kada dati a Pres. Joseph Estrada ken dati a Chief Justice Renato Corona ket naipalubos ti camera kadagiti news organizations iti uneg iti korte.
Iti agdama ket maiparit iti uneg ti impeachment court dagiti camera ti television networks ken dadduma pay a news organizations isu a mangnamnamada laeng iti official Senate video.
Impaganetgetna a rumbeng a baybay-an dagiti journalist nga aramiden iti trabahoda ta napateg a makita ti publiko ti pakabuklan nga impeachment trial.
Kinunana a mabalin a mangipatungpal ti impeachment court ti nainget a pagannurotan tapno masigurado a saan a makaapektar ti impeachment proceedings dagiti camera iti media.
