Kinondenar ni Mamamayang Liberal Party-list Representative Leila de Lima ti panangipila ni Davao City 1st District Representative Paolo Duterte iti kaso a cyberlibel ken libel kontra iti maysa a media network ken sumagmamano a periodista.
Segun ken ni De Lima, mabalin a pakaigapuan ti buteng ken pammutbuteng iti free press ti addang ti kongresista.
Inyarig ni De Lima ti insidente kadagiti addang nga naaramid kabayatan ti administrasion ni dati a Presidente Rodrigo Duterte, pakairamanan ti pannakaipasardeng ti operasion dagiti media network a nangapektar kadagiti rinibo nga empleado.
Impaganetget ti agpampaday-linteg a rumbeng a sungbatan dagiti maseknan dagiti alegasion babaen ti panangtedda iti dasigda iti media, imbes a mamutbuteng tapno masalakniban ti wayawaya ti media ken ti kalintegan ti publiko a mangammo iti kinapudno.
