Nagballaag ti Malakanyang kadagiti rice trader a manggungundaway ti P20 kada kilo a programa iti gobierno a mangipaay koma iti nalaklaka a presyo ti irik.
Segun ken ni Presidential Communications Office Undersecretary ken Palace Press Officer Claire Castro, nakadanonen iti Department of Agriculture ti report nga adda dagiti sumagmamano a traders ti kanayon a mangdakdakamat ti “Benteng Bigas, Meron Na!” program tapno aggatang iti irik iti saan a patas ken nalaka a presyo manipod kadagiti mannalon.
Inallukoy ni Castro dagiti mannalon a makapadpadas ti panagabuso nga insigida nga ireport iti DA, Department of the Interior and Local Government (DILG) wenno Department of Justice (DOJ) a manamnama nga insigida nga agaramid ti legal action iti gobierno.
Sinigurado ni Castro kadagiti mannalon nga insigida a tignayan ti administrasyon dagiti beripikado a reklamo nangruna nu suportado ken adda umanay nga ebidensya.
Kinuna ti ahensya a saan a mabalin a kalintegan dagiti rice trader ti P20 kada kilo iti bagas tapno napalalo iti pananggundaway ti presyo ti irik dagiti lokal a mannalon.
