Irespeto ti Malakanyang ti inruar a warrant of arrest iti Sandiganbayan kontra ken ni Sen. Rodante Marcoleta maipanggep ti kaso a plunder.
Segun ken ni Palace Press Officer Undersecretary Claire Casto, no isu ti naikeddeng iti linteg ken imbilin ti korte, masapul laeng nga ipatungpal ti ehekutibo.
Saan met a pinatulan ti Malakanyang ti sarita ni Mike Defensor nga umun-una pay a maibalud dagiti kritiko ngem kadagiti pudno nga agtatakaw iti pagilian.
Impaganetget ni Castro a no nasapsapa a makaisaang iti kongkreto nga ebidensia, nabayag koman a naipila iti korte ken naisanud dagiti kaso kontra kadagiti karaman iti korapsyon.
Idi nasaludsod no awan ti pagbasaran ti kaso a naipila kontra ken ni Marcoleta, nagkedked ni Castro nga agkomento ken pinasingkedanna a ti patangan ket addan iti korte ken didiay a rumbeng nga isango ti depensa.
Innayon ti Malakanyang a saan a maapektaran iti pannakakemmeg ni Marcoleta ti impeachment trial ta adda idiay Senado ti preseso ken agtuloy latta agingga awan ti bilin ti korte a mangpasardeng dayta.
