Inlawlawag ti House prosecutors nga awan ti akem ti siasinoman a grupo kangrunaan iti Malakanyang iti panagpili ti private prosecutors.
Inramid ni lead prosecutor ken Batangas Rep. Gerville Luistro iti palawag ta karaman ti PECABAR law firm nga indatag ni dati a Chief Presidential Legal Counsel Juan Ponce Enrile nga innalada a prosecutors a mang-trial ken ni Vice President Sara Duterte.
Uppat nga abogado manipod iti nasao a law firm pakairamanan ni Atty. Marforth Fua a dati nga Assistance Presidential Legal Counsel ni Pres. Ferdinand Marcos Jr. iti salinong ni Enrile.
Inamin ni Fua a manipod pay nangrugi ti panawen ni dati a Pres. Ferdinand Marcos Sr. ket associated-n ti PECABAR iti nasao a pamilia ngem ti Private Prosecutors ti nangpila kadakuada.
Kinunana a ti kinapudno ket agkalabanda ken ni Prosecutor Chel Diokno iti korte ngem gapu iti maysa a gagem a dusaen ni Duterte ket nagkaduada.
Uray ni Atty. Lorna Kapunan ket pinaglibakanda nga adda akem ti Malakanyang iti pananglapped kadagiti abogado manipod PECABAR tapno mairaman iti private prosecutors a nagballaaganna a siasinoman a mang-intriga ket ammona met iti agipila iti kaso.
