Kontra ti Makabayan Bloc iti saan a panangilatang ti gobierno iti subsidiya para iti Philippine Health Insurance Corporation iti salinong ti naaprubaran a 2025 budget.
Iti pannaki-uman ti Bombo Radyo Vigan ken ni ACT Teachers Partylist Rep. France Castro, dakkel ti panagkasapulan dagiti umili iti serbisyo medical isu a napateg a mailatangan latta koma iti subsidiya a maipaay kadagiti indigent citizen, dagiti senior ken vulnerable.
Singasingna a ti naikkat nga P89-billion a pondo ti Philhealth a naipan iti National Treasury ket nailatang koma kadagiti ospital tapno mabaklayna dagiti kasapulan dagiti umili.
Numan pay ti addang ket kas panangdusa iti Philhealth, kinuna ti kongresista nga arigna dinusa metten ti gobierno dagiti umili nga agkasapulan.
