VIGAN CITY – Sangapulo ket dua a sako ti pork chicharon nga aggatad ti sangapulo ket uppat a ribo walo gasut a pisos (PHP 14, 800) a naikarga ti Mercedes Benz Van a kinamat dagiti kameng ti animal quarantine checkpoint idiay Barangay Bio, Tagudin agingga idiay Barangay Becques.
Nabigbig iti nagmaneho ti nasao a van a ni Emson Pangilinan, agtawen ti dua pulo ket maysa, baro, agnaed idiay Barangay 13 Baay, Batac City, Ilocos Norte.
Idi naabutan dagiti otoridad ti nasao a van idiay Barangay Becques, nakita da dagiti nasao a produkto ngem awan iti naiparang ni Pangilinan a naan-anay a dokumento dagiti karga na.
Agsipud iti dayta, posible a makasoan ni Pangilinan iti panaglabsing ti Provincial Ordinance no. 15-06 series of 2015 inaig iti nainget a quarantine checkpoint ditoy probinsiya.
