VIGAN CITY – Dua a napateg a katulagan iti pinirmaan ti Dito Telecommunity ni Dennis Uy, ti pamilya Lopez kenni Mayor Luis “Chavit” Singson a maysa kadagiti kabalubal na idi para iti maikatlo a telco ditoy pagilian.
Ti katulagan a nagpinnirmaan ti Dito Telecom ken ni Singson nga akin-kukua ti LCS Holdings ket para iti panangusar da ti common towers ti LCS Group a maipatakder to kadagiti mapili a lugar ditoy pagilian.
Ingunam- gunam ni Singson kadagiti napalabas nga interview ti Bombo Radyo Vigan nga uray nu naglaban da idi ken ni Uy para ti bidding iti maikatlo a telco player, nakasagana iti kompanya da a mangtulong kadakuada nu anya dagiti kasapulan da.
Ti ceremonial signing iti nasao a katulagan ket nakipasetan ni Dito chief administrative officer Adel Tamano kenni LCS Holdings vice chairperson Richelle Singson Michael a putot ti dati a gobernador.
Malaksid iti dayta, nagpirma pay ti Dito a ti dati a nagan na ket Mislatel iti katulagan iti kompanya ti pamilya Lopez para kadagiti kasapulan a fiber optic cable a mausar idiay Metro Manila.
Mangrugi ti commercial operation ti Dito sakbay nga agtapos iti agdama a tawen wennu iti umuna a quarter iti sumaruno a tawen.
Dagiti mangbukel ti nasao a telco ket ti Udenna Corporation ti Davao – based businessman a ni Dennis Uy, Chelsea Logistics ken ti China Telecom.
