VIGAN CITY – Kaso a panaglabsing iti Republic Act 10591 wenno Comprehensive Firearms and Ammunition Act ken Grave Threat ti sangwen ti maysa a lalaki a nangipaturong iti paltog iti kaduanaa a naginom idiay Brgy. Cabulanglangan, Tagudin.
Ti suspek ket ni Arnold Ramos., agtawen iti uppat a pulo ket innem, construction worker a residente ti Brgy. Ag-aguman idinto a ti biktima ket ni Alfredo Pacheko Jr, agtawen tallo pulo ket maysa, construction worker a taga Brgy Cabulanglangan.
Iti pannaki-uman ti Bombo Radyo Vigan ken ni P/Capt. Jose Bandong, hepe ti Tagudin Municipal Police Station, agin-inom ti biktima ken suspek iti pagtaengan ni Berting Fabro idin ta adda saanda nagkinnaawatan ket dimmanog ti suspek sa pimmanaw ket idi agsubli, pinaturonganna iti paltog ti biktima.
Naala dagiti pannakabagi ti linteg manipud iti suspek ti maysa a homemade shotgun 12 gauge, awan markana ken bala nga inaramat ti suspek nga adda itan iti Tagudin Police Station tapno maidalan iti husto a proseso.
Nupay kasta, kiniddaw ni Bandong kadagiti agik-ikot ti iligal a paltog a mapanda irehistro tapno saanda a matiliw.
