VIGAN CITY – Kaso a panaglabsing ti Republic Act 8293 wenno ti Intellectual Property Code Selling of Fake Cigarettes iti sanguwen ti lalaki a suspek iti panagilako iti peke a sigarilyo a nakemmeg iti entrapment operation idi kalman idiay nagbeddengan ti Barangay Poblacion ken Barangay Nalasin, Sto. Domingo.
Nabigbig ti suspek a ni Albert Rivera, agtawen ti tallo pulo ket tallo, naasawaan a taga-San Pascual, Talavera, Nueva Ecija ngem agdama nga agnanaed idiay Brgy. Villa Quirino San Esteban.
Ti operasyon ket nagramot iti intelligence report a naawat ti Sto. Domingo municipal police station nga adda dagiti agideldeliver ken agilaklako kadagiti peke a sigarilyo ditoy probinsiya.
Dagiti naala ti Sto. Domingo municipal police station nga idaulwan ni Police Captain Christopher Ramat a kontrabando ken ti suspek ket innem a pulo a rim tip eke a sigarilyo a mapatta-patta nga aggatad ti tallo pulo ribo a pisos.
Napaneknekan a peke dagiti sigarilyo a naala dagiti otoridad nga ikot ti suspek agsipud ta agpapada dagiti serial number ken stamp a nakaitatak iti kaha na.
