Nakemmeg babaen iti search warrant operation ti maysa a lalaki a sumangsango iti kaso a panaglabsing ti Republic Act 10591 wenno ti Comprehensive Firearms and Ammunition Act iti Brgy. Lapting, San Juan, Ilocos Sur.
Nabigbig ti suspek a ni George Julian Pizarro, naasawaan, ken residente iti nasao a barangay.
Iti pannaki-uman iti Bombo Radyo Vigan ken ni PMAJ Benjamin S. Raquedan, officer-in-charge ti San Juan Police Station, awan ti naala a bala iti paltog, ken unregistered ti paltog.
Ti search warrant na ket inruar ti Presiding Judge ti RTC Branch 24, Cabugao, napetsaan iti December 17, 2025.
Nakumpiskar iti nasao nga operasyon ti maysa a unit ti caliber 22 rifle nga adda scope na; maysa a magasin ti caliber 22; ken maysa nga air gun wenno iskupeta.
Innayon pay ni Raquedan a no mabartek ti suspek ket alaenna ti ikot nga paltog nga isu ti araramatenna a pangbugaw kadagiti aso ken pangbutbuteng kadagiti karrubana ken iti asawana no agririda.
Nakakustodian ti suspek ken dagiti naala nga igam tapno maidalan iti husto a proseso.
