Dead on arrival ti maysa a lalaki a nakoriente kabayatan ti panagsibbolna iti mangga idiay Barangay Naguiddayan, Bantay, Ilocos Sur.
Ti biktima ket maysa a lalaki ket agtawen iti duapulo ket uppat, tubo iti Pangasinan ngem agdama nga agnaed iti nasao a barangay.
Iti pannaki-uman ti Bombo Radyo Vigan ken ni Police Captain Donaldson Pagalanan, agsibsibbol ti biktima iti mangga babaen iti nasilpo-silpo nga aluminum pole nga isu ti naisagid iti waya a puon ti pannakakorientena.
Naitaray iti ospital ti biktima tapno mataming ngem saanen a nakalasat.
Nagbalakad met iti publiko nga agannad no agtrabtrabaho iti asideg kadagiti electrical lines ken liklikan ti agusar kadagiti conductive materials a mabalin a maisagid kadagiti waya tapno saan a maulit ti kas ti nasao a pasamak.
