VIGAN CITY – Nasurok-kumurang walo a gramo wenno aggatad ti P54,400 ti mapapati a shabu iti naala manipod ti maysa a lalaki a nakemmeg iti buy bust operation idiay Barangay Bulanos, Narvacan, Ilocos Sur.
Ti suspek ket ni Christopher Ittog Garcia, agtawen iti duapulo ket dua, naasawaan nga agnaed idiay Sitio Limmansangan, Narvacan.
Iti pannaki-uman ti Bombo Radyo Vigan ken ni PCpt. Jonathan Jornadal a team leader iti PNP-DEG, SOU1 iti Ilocos Sur ken Ilocos Norte, adda nangipakaammo kadakuada inaig ti ilegal nga aramid ti suspek isu nga insayangkatda iti operasyon babaen ti panaggatang ti shabu ti polis a nagpammarang a buyer.
Segun ken ni Jornadal, agsapsapul ti buyer ti suspek isu a naki-transact dagiti otoridad a gappuanan ti pannakakemmegna.
Naamoan a datin a nakemmeg ken naibalud ti suspek idi 2015 iti ili ti Bantay iti isu met laeng a kaso ngem nakaruar laeng idi 2019 a gappuanan ti panangituloyna ti ilegal nga aramidna.
Naala kenkuana ti maysa a piraso ti medium size ti heat sealed transparent plastic sachet a naglaon ti mapapati a shabu nga aggatad ti P4,000, uppat a piraso ti medium size heat sealed transparent plastic sachets a naglaon ti mapapati a shabu, uppat nga small heat sealed transparent plastic sachets a naglaon ti mapapati a shabu, maysa a piraso ti sangaribo a pisos a naaramat a buy bust money, maysa nga olive green pouche, maysa a cellphone, tulbek ti lugan, lighter, P409 ken maysa a unit ti motorsiklo a Yamaha bega color black 125cc.
Kiddaw ni Jornadal kadagiti agar-aramid iti maikaniwas nga isardengdan ti madi nga aramidda tapno saanda a maisagmak kadagiti araramidenda a saan a nasayaat nga aramid.
VIDEO – CPT. JONATHAN JORNADAL
