Maysa a lalaki ti nakemmeg gapu iti panagtakawna iti kalding idiay Barangay Katipunan, Sinait, Ilocos Sur.
Nabigbig ti suspek a ni Jerome Ibera Corpuz, agtawen iti duapulo, caretaker ti RDC Farm, taga-Barangay Barikir, Sinait.
Ti met biktima ket ni Erickson Dano Ponce, agtawen iti uppat a pulo ket saiam, Administrative Aide III ti LGU-Sinait, taga-Barangay Ballaigui, Sinait.
Iti pannaki-uman ti Bombo Radyo Vigan ken ni PLT Elmer Asistin, Deputy Chief of Police ti Sinait Police Station, alas singko y media iti malem ti Agosto 19, idi mapanna kitaen dagiti kaldingna iti nagiwaywayanna ket naduktalanna a maysa kadagiti kaldingna a turo ti mapukpukaw.
Nagimbestigar ti Sinait Police Station ket natakuatan a ti suspek ket inlakona ti kalding iti gatad a PHP1,500 ken ni Gladwin Lumabao Yoro, agtawen iti uppt a pulo ket dua, taga-Barangay Jordan, Sinait.
Boluntaryo met nga insuko ti gimmatang iti kalding kadagiti nagresponde a pannakabagi ti linteg.
