Nabiktima iti prank call ti maysa a lalaki nga owner ti junk shop idiay Barangay Tablac, Candon City, Ilocos Sur.
Alas otso iti rabii ti July 8 idi napan ti biktima iti Candon City Police Station ket inreportna a nakaawat isuna ti tawag manipud iti dinakamatna a numero.
Kabayatan ti pannakipatangna, nagpayam-ammo ti caller kas Chief of Police ti Candon City Police Station ket kiniddawna a gumatang iti 3 a bote ti Chivas Regal Whisky ken ideliver-na dagitoy iti Candon CPS, ta mapapati nga iregaloda iti Provincial Director of Ilocos Sur Police Provincial Office. Inyunay-unay pay ti timmawag nga urgent ti kiddawna.
Ala una disi sais iti malem iti isu met laeng nga aldaw, nakaawat manen iti sabali a tawag manipud iti sabali a numero a nagpayam-ammo kas police segeant iti Candon City CPS.
Pinakaammoan ti maikadua a caller ti biktima nga isuna ti mangala dagiti 3 a botelya ti Chivas Regal.
Gapu ta namati ti biktima a pudno dagiti request, nagdesision nga isunan ti mangipan dagiti botelya ti Chivas Regal ngem naibaga kenkuana ni PLTCOL. Del Castillo nga awan ti in-request-da ken awan ti asino man nga impatudonda.
