Dead on arrival iti ospital ti maysa a lalaki a saan pay a nabigbig gapu iti pannakadungparna ti maysa a van iti national highway idiay Barangay Nanguneg East, Narvacan, Ilocos Sur idi alas nuebe dies idi rabii, November 20, 2024.
Segun ti Narvacan Municipal Police Station, ti biktima wenno pedestrian ket saan a nabigbig ngem agtayag iti 5’5, brown complexion, nagaramat ti camouflage sleeveless, cream shortpants ken nangisit a bull cap ken mapapati nga agtawen iti limapulo agingga limapulo ket lima.
Ti met nagmaneho iti silver Toyota Grandia ket ni Limuel Gadingan Duque, agtawen iti uppat a pulo ket uppat nga agnaed idiay Barangay Nanguneg East, Narvacan.
Iti imbestigasyon ket magmagna ti biktima iti laud a paset ti kalsada ken agturong ti bagatan a direksyon idin dinungpar ti van nga adda iti likodna nga agturong met laeng iti nasao a direksyon.
Gapu ti impact ket naibansag ti biktima a gappuanan ti pannakadundunorna idinto a nagturong pay laeng ti suspek ti daya a direksyon nga agturong iti Barangay Cagayungan, Narvacan.
Naipan ti biktima iti Ilocos Sur District Hospital Narvacan ngem naideklarar a dead on arrival babaen ti attending physician-na a ni Dr. Winnie Valdez.
Insayangkat dagiti pannakabagi ti linteg ti hot pursuit operation a nagresultaan ti pannakakemmeg ti suspek iti pagtaenganna idiay Barangay Nanguneg East, Narvacan.
Iti agdama ket addan iti kustodiya ti Police Station ti suspek ken lugan a naaramat.
Makikamkammayet met dagiti otoridad iti amin a barangay officials iti Narvacan para ti pannakabigbig ti biktima.
(Daytoy ti ladawan ti lalaki)
