VIGAN CITY – Mamati dagiti kameng ti Candon City police station nga idaulwan ni Police Lt. Col. David Dulnuan nga awan iti foul play iti pannakatay ni Jaster Wurdo Mondina Toquero nga agtawen ti dua pulo nga agnaed idiay Barangay Patpata 2nd, Candon City a nasarakan iti bangkay na iti maar-aramid a rangtay idiay Zone 4 iti nasao a barangay ta maibasar iti imbestigasyon ti Scene of the Crime Operatives (SOCO), nadisgrasya ti biktima a naglugan iti motorsiklo ket naubon iti barukong na iti landok a paset iti maar-aramid a rangtay ta natnag pay iti nagluganan na a motorsiklo iti uneg ti nakali a paset iti nasao a kalsada.
Segun ken ni Dulnuan, naggapu ti maysa a bar idiay Sta. Lucia ti biktima, kadua na ti dua a gagayyem na ket mapatta-patta a napasamak iti aksidente idi agawid kuman iti pagtaengan da.
Maibasar iti testimonya dagiti gagayyem na, naud-udi a nagrubwat iti bar ti biktima isu a saan da a namonitor nu nakaawid iti pagtaengan da wennu saan.
Immun-una a naipadamag a maysa a bangkay iti nasarakan ni Manuel Haboc Galdones idi madama iti panagjogging na iti maar-aramid a rangtay iti nasao a lugar ngem maibasar iti naun-uneg nga imbestigasyon, vehicular accident iti napasamak a nakainbolbaran ti biktima.
