VIGAN CITY – Pinaglibakan ti lalaki nga agtawen ti uppat a pulo ket dua (42) iti pammabasol kontra kenkuana a rinames na ti putot na a menor de edad nga isu iti poon iti nakakemmegan na idi naminsan nga aldaw idiay Bulacan.
Segun ti suspek a personal a naka-uman ti Bombo Radyo Vigan iti uneg ti custodial facility ti San Juan municipal police station, nga idi naiparuwar ti warrant of arrest kontra kenkuana ket nagbuteng a maibalud isu a naglemmeng agingga a nakemmeg dagiti otoridad idiay Bulacan idi rabii ti February 10.
Ti warrant of arrest kontra ti suspek ket inparuwar ni Hon. Raphiel Alzate, presiding judge ti Regional Trial Court, Branch 24, Cabugao idi March 21, 2018.
Inlawlawag ni Police Staff Sergeant Precious Paoa ti Women’s and Children’s Desk ti San Juan PNP a maibasar iti pannaki-uman da ti biktima, pasado alas dose iti tingnga ti rabii idi September 2016 idi matmaturog ti biktima ken ti kabsat na idi nakika-idda kenkuana ti ama na a mapapati a nabartek.
Pinangtaan ti suspek ti biktima a nu agipulong ken patayen na isuna karaman ti ina ken kabsat na isu a nagulimek lattan ti biktima ket binay-bay-an nan ti suspek a nangmolestiya ken nangrames kenkuana.
Gapu iti buteng ti biktima, napan nagkamang iti pagtaengan ti uliteg na agingga a naipan iti pagtaengan ti ikit na ngem napan sinurot ti suspek a kinabil-kabil ta kayat na a pagawiden ngem saan nga immannugot ti biktima.
February 17, 2017 a napan nagreport ti biktima idiay San Juan PNP kadua na ti ina na a naggapu idiay abroad ken ti ikit na ket naisayangkat iti inisyal nga imbestigasyon sa naipila iti naan-anay a kaso kontra ti suspek agingga a naiparuwar ti warrant of arrest na idi 2018 inaig ti dua a bilang iti kaso a panaglabsing ti Republic Act 7610 wennu Special Protection on Children’s Act ken qualified rape thru sexual assault.
