Nakemmeg ti maysa a lalaki a nangbagkong ken nangtagbat iti padana a mannalon iti Barangay Cadacad, Narvacan, Ilocos Sur.
Ti biktima ket agtawen iti duapulo ket tallo idinto a ti suspek ket agtawen iti tallopulo ket innem, agpada nga agnaed iti nasao a lugar.
Agin-inom ti suspek ken biktima kadua dagiti dadduma pay iti pagtaengan ti suspek idin rimsua ti saan a nagkinnaawatan ti suspek ken ti maysa a kaduada a naginom a kasinsin ti biktima.
Naririan ti biktima isu a rimmuar manipud iti ayanna a pagtaengan ket pinadasna ti naganawa.
Nupay kasta, ti biktima ti napagpungtotan ti suspek ket binagkongna ti sakana babaen iti ice pick.
Simrek ti suspek iti uneg ti pagtaenganna a nangala iti buneng nga agrukod iti 20 a pulgada sa nagsubli a nangtangbat iti bukot, dakulap, ken akin-kannawan a kilikili ti biktima.
