Lalaki a naka-motorsiklo, naaksidente, natay idiay San Vicente

VIGAN CITY – Natay ni Efren Jimenez, agtawen ti uppat a pulo ket pito, agnaed idiay Sitio Ermita West, Brgy. San Sebastian, San Vicente ta naaksidente idi malem idi kalman iti nasao a lugar.

Agpapa-amyanan ti biktima a nakalugan ti Euro 150 motorcycle idi mapapati a saan na a nakontrol iti manibela ti motorsiklo ket naidungpar iti konkreto nga alad iti igid iti kalsada.

Agsipud iti dayta, nagsagaba iti nakaro a dunor iti ulo ti biktima ta awan ti helmet na idi napasamak iti aksidente.

Atapen ni Police Corporal Jay ar Rabara ti San Vicente municipal police station a  nabartek ti biktima ta napaspas iti panagpatarayna iti luganna nga agawid kuman idiay pagtaengan da.