Naiwayatan ti search warrant operation ti maysa a lalaki nga agtawen iti limapulo ket maysa a taga-Sta. Lucia gapu iti panaglabsing ti Republic Act 10591 wenno Illegal Possession of Firearms and Ammunition.
Ti search warrant ket inruar ti Executive Judge, Branch 71 First Judicial Region, Regional Trial Court, Candon City a napetsaan idi September 15, 2025.
Naala iti maysa a unit iti caliber .22 a nabigbig nga Armscor model 1500, maysa a magazine iti caliber .22, tallopulo a piraso iti live ammunition para iti cal. 22, sangapulo ket tallo a piraso iti live ammunition para iti cal .22, maysa a piraso iti holster, maysa a unit iti homemade firearm iti cal .45 ken maysa a piraso iti live ammunition iti cal .45.
Bayat iti pannakaisayangkat ti search warrant ket nadiskubre dagiti otoridad manipod iti akusado iti drug evidence a maysa nga improvised tooter ken maysa a piraso iti white crystalline substance iti uneg ti plastic container.
Maisagsagana ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken Republic Act 10591 kontra iti akusado.
