VIGAN CITY – Naipilan iti kaso kontra ken ni Jomar De Guzman Dudang nga agtawen iti dua pulo ket maysa, baro ken agnaed idiay Baclig, Cabugao a mapapati a nagtakaw iti sangapulo a sako ti semento iti construction site iti manarimaan a maar-aramid a rangtay iti nasao a lugar idi alas dos y media iti parbangon idi April 14.
Segun ken ni Police Lieutenant Romar Renon, deputy chief of police ti Cabugao municipal police station, posible a saan a naitaray nga insigida ti suspek iti kurong-kurong a nangiluganan na kadagiti semento gapu ti kinadagsen na isu a nakita dagiti nagresponde nga otoridad iti kaadayo a sangagasut ket lima pulo a metro manipud iti nagtakawan na a construction site.
Kinuna ni Renon a kabayatan iti panagsaludsod da ken ti suspek ket naibaga na a dagiti kuma semento nga innala na ket pagbalay na.
Ti agdama, nakakustodiya pay laeng kadagiti kameng ti Cabugao PNP ti suspek.
